يا أى مصرى، إذا كنت نسيت دم الشباب اللى مات عشان حريتك وهو فى عمر الزهور.. ما تنزلش يوم ٣٠.. إذا كنت موافق إن مصر أم الدنيا تتحول لدويلة ليست لها قيمة تتحكم فيها وفيك دويلات كانت تتمنى أن ننظر لها بعين الرضا.. ما تنزلش يوم ٣٠.. إذا كنت عايز تقضى حياتك فى أزمات عيش وسولار وزبالة وأمراض ومستقبل ضلمة ليك ولولادك ولأحفادك (ده إذا اتجوزت أصلا وكان فيك حيل تخلف) ما تنزلش يوم ٣٠.
إذا كنت موافق يتقبض عليك علشان بتسمع غنوة لثومة أو بتشوف فيلم لعادل إمام بتهمة الكفر والإلحاد وممارسة الفجر والفسوق ما تنزلش يوم ٣٠.. إذا كان عاجبك إن مصر يحصل فيها حرب أهلية والمسلم والمسيحى يموتوا بعض وبعدين السنى والشيعى والكاثوليكى والأرثوذكسى والكل يحل دم التانى ما تنزلش يوم ٣٠.. إذا كنت مبسوط إن واحد نطع طول بعرض بجلابية باكستانى يوقفك وإنت ماشى مع مراتك ويضربك عشان مش مغطية وشها وإنت مش قادر تنطق ما تنزلش يوم ٣٠.. إذا كنت سعيد إنك تعيش من غير كرامة ولا رأى ولا معنى عبدا ذليلا لشيوخ بيدعوا إنهم معاهم مفتاح الجنة وصكوك الغفران ما تنزلش يوم ٣٠.
إذا كنت شايف إن الطبيعى إننا ننسى كل تاريخنا الحضارى العظيم طوال ٧٠٠٠ سنة وإن الحضارة الفرعونية حضارة جدى وجدك حضارة معفنة، وإن عمك وعمى نجيب محفوظ بيقدم دعارة فى أدبه، وإن الزعيم ناصر حبيب الشعب جبار يستحق الرجم ودخول جهنم، وطه حسين ملحد، وعبدالرحمن الشرقاوى خارج عن الملة، وتماثيل ومعابد الفراعنة أوثان يجب هدمها، وإن تقسيم مصر حلال، وإن سينا تبقى إمارة إسلامية حمساوية، وقناة السويس تبقى إقليم، ومصر (طظ فيها) وتاريخها بدأ مع البنا اللى لولاه كان الإسلام اختفى من مصر، وإن اللى قتلوا السادات يقعدوا مكانه يوم ٦ أكتوبر، وإن رئيسك يبقى مأمور من المرشد اللى مأمور من بره، وإن هيبة مصر تبقى خيبة، وإن يبقى زعماء بلدك بعد ما كانوا مصطفى كامل ومحمد فريد وسعد زغلول وناصر يبقوا صفوت حجازى وحازم صلاح أبوإسماعيل ومحمد مرسى العياط وصبحى صالح، والغزالى والشعراوى يتحط مكانهم أبوإسلام ووجدى غنيم وخالد عبدالله، وإذا وافقت إن الأوبرا تبقى اسطبل ومدينة الإنتاج مجزر ومراحيض عمومية والناى الحنون يبقى ميكرفون بيصرخ فيه متشنج مجنون، إذا وافقت على الصورة السودا دى ما تنزلش يوم ٣٠، وإذا كنت شايفها ومش موافق عليها يا تنزل مع الناس يا تبقى لا مؤاخذة....
آخر الكلام.. يا مصر قومى وانزلى.. إملى الشوارع زلزلى.. آن الأوان ياللا اعزلى.. كل اللى خان تار الشهيد.. إنتى التاريخ وهم مين.. يا كبيرة فن ونور ودين.. إحنا الولاد المخلصين.. أحرار ف حبك مش عبيد.. النصر للشعب اللى ثار.. مش للعبيد ولا التتار.. نازلين عشان ناخد بتار.. مينا وأخوه خالد سعيد.. اصحى يا مصر.
المقال الاصــلي
إرسال تعليق